Eksportguide

Innholdsfortegnelse

Deklarering ved eksport

I tillegg til å setje deg inn i reglane for eksport frå Noreg, må du følgje regelverket for i import i mottakarlandet. Du må kontakte styresmaktene i mottakarlandet for meir informasjon om kva reglar som gjeld der.

Deklarering via tollrepresentant eller transportør

Tollrepresentantar eller transportørar vil ofte kunne ta seg av deklarering og transport for deg. Ein tollrepresentant er ein person eller eit firma, som kan syte for transport og levere deklarasjon for andres rekning.

Tollrepresentantar er som regel knytte opp mot Tolletaten sitt elektroniske fortollingssystem (TVINN), og utfører deklarering elektronisk i dette systemet.

Sjølv om du bruker tollrepresentant, er du som eksportør uansett ansvarleg for at deklarering blir utført i tråd med regelverket.

Deklarering på eit tollkontor

Det er krav om elektronisk levering av deklarasjon frå næringsdrivande. Privatpersonar er fritekne frå kravet om elektronisk deklarering. Privatpersonar må derimot fylle ut ein utførselesdeklarasjon og deretter møte opp hos Tolletaten med nødvendig dokumentasjon som faktura, fraktdokumentasjon, løyve og liknande.

Restriksjonar ved eksport

Somme varer er underlagde ein restriksjon ved eksport. Det vil seie at vara er avhengig av spesielle løyve eller at det gjeld spesielle vilkår ved eksport frå Noreg.

Hugs også å sjekke med styresmaktene i mottakarlandet om det er restriksjonar ved import av vara der.

• Les meir om restriksjonar ved eksport

Avgifter ved eksport

Det er berre ved eksport av fisk og fiskeprodukt du per i dag må betale avgifter.

• Les om eksport av fisk

Transport av varer

Når vara er deklarert og Tolletaten har gjeve løyve til eksport, kan transporten av vara starte. Du står fritt til sjølv å velje på kva måte du ynskjer å transportere vara og kven som skal sende den for deg.

Transport av varer gjennom andre land

Nokre varer blir transporterte gjennom fleire land på veg frå Noreg. Gjennom ei transittering tillèt tollforvaltninga transport frå seljaren i eitt land og fram til ein mottakartollstad i eit anna land, der transporten kan passere fleire land undervegs. Ei transittering skal sikre at varene kjem fram til framkomstmålet i mottakarlandet.

• Les meir om transittering

Unntak og letter frå deklareringsplikta

Det er nokre unntak og letter frå deklareringsplikta.

Blant anna er det unntak for

• transportmiddel o.l. som er i bruk på reisa frå Noreg og tilbake igjen
  • Skal transportmiddelet bli verande i utlandet, til dømes ved sal, må det deklarerast for utførsel
• yrkesutstyr av mindre verdi
• reisegods
• andre varer som ikkje er avhengige av løyver frå andre styresmakter der verdien ikkje overstig 5 000 kroner per sending

Førebels deklarering

I nokre tilfelle kan vareeigar nytte ei førebels deklarering. Krava for å nytte førebels deklarasjon er strenge, og Tolletaten vurderer om krava er oppfylte i kvart enkelt tilfelle.

• Les meir om vilkår for førebels deklarering

Mellombels eksport

Det er eigne reglar for deklarering av varer som skal mellombels ut av Noreg.

Restriksjonar på varer

Det er restriksjonar knytte til enkelte varer. Dersom vara er underlagd ein restriksjon, skal du alltid deklarere vara ved utførsel, sjølv om vara fell inn under eit unntak frå deklareringsplikta, sjå avsnittet over.

• Les om ulike restriksjonar

Frihandel og opphav

Bruker du opningane som ligg i frihandelsavtalane Noreg har, kan produkta dine få lågare toll eller tollfridom ved import til desse landa. Dette kallar vi preferansetollbehandling. For at mottakar skal få preferansetollbehandling i importlandet, må det vere utferda eit opphavsbevis for varene.

• Les meir om frihandel og opphav ved eksport
• Sjå korleis du kan forenkle eksportprosessen ved å få status som godkjent eksportør

Klassifisering av varer

Alle varer er klassifiserte med eit varenummer i tolltariffen. Eventuelle tollsatsar, avgifter, gebyr og restriksjonar er alltid knytte opp til dette varenummeret. Når du deklarerer, må du oppgje varenummeret.

• Les meir om korleis du finn riktig varenummer tolltariffen

Svalbard og Jan Mayen

Svalbard og Jan Mayen er å rekne som tollmessig utland. Det vil seie at du må deklarere varer som du eksporterer dit.